صيدا

دايماً المنطقة يلي إنت ساكن فيها بتكون أبعد منطقة براسك حتى تزورها وتكتشفها وفعلياً هيدا يلي صار معي! في نهار قررنا بالصف مع استاذنا إن ننزل من بكير لا نكتشف شو يعني صيدا "البلد". كتير كنت إسمع عن صيدا البلد وقدي أهل ناس طيبين ومعترين بس بنفس الوأت
كنت إسمع إنو تحت كل واحد عايش لراسو وإنو كل ما دق هالكوز بهالجرة بصير في مشاكل وحمل سلاح يعني من الاخر شي ما كتير بطمن! بس متل ما اتفقنا على الساعة 8 كنا عساحة النجمه وناطرين لا يكتمل عددنا. شي ربع ساعة وكانت رحلتنا مبلشي بالأول فتنا من شارع صيدا الرئيسي ويلي هو شارع الضمان هيدا الشارع يلي بضم كل المحلات على انواعها من محلات ثياب لاحذية، أكل، حتى انك بتلاقي مكتبات ولحد اليوم بتلاقي روايات عبير!! فضل عن الأسواق يلي هي عمدى عينك إلا إنو ببناية الضمان يلي هي محور هيدا الشارع في درج صغير ممكن إنو يوصلك على سوق تاني وهو سوق شعبي وبسيط جدا وأشهر محل في هو "وان دولار" و يلي فعلياً ما بتلاقي عندو شي بدولار!! والحلو بهل شارع إنو ببلشو في المحلات بالتدرج يعني مثلاً ببلش بمحلات للطبقة المتوسطة نوعاً ما و بيخلص ببسطات شعبية وعلى الرغم من الريحة يلي معقول تشمها إنت وماشي بهالشارع إلا إنو عنجد في بتحس بقيمة صيدا وناسها لأنو بكل بساطة بيجمع كل أهل صيدا ولو من أية فئة كانو. وعلى فكرة يلي نسيت قولوا إنو بهيدا الشارع ممكن تاكل أطيب كنافة بالمعمورة وهي عند الوتار. 

باخر هيدا الشارع عندك مفرقين واحد بوديك ع صيدا البلد وواحد بوصلك على بوابة صيدا الفوقة أو المعروفة أكتر بالقلعة البريه وبما إنو وجهتنا كانت صيدا القديمة أو صيدا البلد فكان من الطبيعي إنو نروح عن اليمين. بتبلش صيدا القديمة بعدة محلات عن اليمين بتلاقي محلات اللحمة،السمك والدجاج وعن الشمال محلات التياب وتجهيزات البيوت وهالتفاصيل. صراحةً ما فيي سميلكن شوارع بصيدا البلد، واحد لأنها كتير كبيره واثنين لأن من وين ما فتت وشو ما عملت بالأخير حتلاقي مخرج ورح تطلع منو وهيدا هو الحلو إنو بتحس حالك بمغامرة استكشافية ومن أول ما تصير تحت القناطر بصير عندك هيدا الشغف حتى تكفي وحدك وصدقني بتصير حابب تضيع لتكتشف أكتر، أول وجهة كانت فرن قديم بيعمل المناقيش على الحطب ومن بعد ما مشينا كتير وتحملنا نق من رفيقتنا كتير كمان وصلنا على المحل المراد بس طلع إنو صاحبوا توفى من شي سنه تقريباً وللأسف! كفينا مشوارنا حتى قطعنا بخان الصابون يلي من خلاله منتعرف عكيفية صناعة الصابون وكيف إنو الصابون بيتنوع باشكاله وحتى بريحته وإنت وبالخان ما بتشم إلا ريحة النضافة، من بعد خان الافرنج بصيدا القديمة بتلاقي قصر دبانه يلي بيتميز بطابع هندسي عثماني بالأول كان بيملكوا ناس من بيت حمود من صيدا بس بعدين اشتراه جوزيف دبانه وسكنو في العيله لفترة قبل ما يتحول لا معلم أثري و متحف.

ويلي بميز صيدا القديمة إنو بتلاقي فيها عدة كنائس منها كنيسة الروم الأرثدوكس يلي نبنت سنة 1960 وأحلى شي موقع هيد الكنيسه هي بقلب البلد من جوا وبن حواري كتير ضيقة هيدا بحد ذاتو عامل كفيل لحتى تبين صورة صيدا الحقيقية يلي فعلاً بتفرجيك إنو أهل صيدا كانو قادرين يتعايشو  إسلام، مسيحية وحتى يهود! وحتى بعدو بصيدا القديمة لهلق في حارة إسمها حارة اليهود و كان في معبد بس من بعد ما فلو إستعملوا ناس وسكنوا في. وبالمقابل بتلاقي بصيدا عدة جوامع وأشهر واحد فيهن هو الجامع العمري المعروف بالجامع الكبير بناه المماليك سنة 1291 وسموا العمري نسبةً لعمر بن الخطاب، ويعتبر أكبر جامع بصيدا ومن أجملهن على صعيد نمط العمارة الإسلامي بإمتياز. في أقاويل كتير حول هيدا الجامع شي بقول إنو بنوا المماليك كجامع وشي بقول إنو انبنى بالأول عأساس كنيسة بس بعد العدوان الإسرائيلي على لبنان سنة 1982 وتهجير المسيحية من صيدا تحول لجامع. 

 ما فيك تزور صيدا بلا ما تعرف إنو كان في حمامات كتيرة، بنوها العثمانيين وغيرن متل حمام المير، حمام الجديد، حمام  الشيخ، حمام البنات وحمام الورد يلي بعدن بيستعملوا لليوم بالنهار للنساء وبالليل للرجال. وأكيد ما فينا ننسى خان الافرنج يلي هلق بيعتبر بوابة صيدا من خلال كل المهرجانات يلي بتصير في، حتى معارض الصور، الرسم وغيرها. وحتى تكون زيارتك صيداوية بإمتياز لازم يا تبلشها بترويقة فول عند أبو عزو بالبلد أو انك تنهيها بسندويش فلافل من عند أبو رامي يلي هو بوج القلعة البحرية على الطريق العام البحري لصيدا.

 لور قلوط